Ифтитоҳи маркази атласу адрасбофӣ дар шахраки Сирдарё

Хуҷанд, 14.07.2015. (АМИТ «Ховар»).-Бо ташаббуси Мақомоти иҷроияи ҳокимияти давлатии шаҳри Қайроққум 1,1 км роҳи марказии шаҳраки Сирдарё пурра мумфарш хоҳад шуд. Корҳои роҳсозӣ дар ин шаҳрак бо иштироки муовини раиси вилояти Суғд Заробиддин Файзуллозода ва раиси шахри Қайроққум Матлуба Амонзода оғоз ёфтанд.
Баҳри иҷрои дастури раиси вилояти Суғд Абдураҳмон Қодирӣ оид ба таъсиси марказҳои ҳунаромӯзӣ дар ин шаҳрак инчунин маркази таълимии атласу адрасбофӣ ба фаъолият оғоз кард. Ба ин марказ аз ҷониби роҳбарияти Мақомоти иҷроияи ҳокимияти давлатии вилоят ду адад таҷҳизоти адрасбофӣ ба таври ройгон тақдим гардид, ки дар натиҷа 20 нафар бону бо ҷои кор таъмин шуд.