Истеҳсоли маҳсулоти саноатӣ дар пойтахт афзудааст

      Душанбе, 29.07.2015.(АМИТ «Ховар», Марзия Саидзода).-17 корхонаи нави саноатӣ дар зарфи шаш моҳи соли равон дар пойтахти кишварамон -шаҳри Душанбе ба фаъолият шурӯъ карданд, ки корхонаи  истеҳсоли нӯшокиҳои ғайриспиртии «Ширкати Кока- кола нӯшокиҳои Тоҷикистон» калонтарин корхонаи саноатӣ маҳсуб мешавад.
        Шӯҳрат  Мақсудзода, муовини  раиси шаҳри Душанбе, ки масъул дар бахши иқтисоди пойтахт аст, мегӯяд:  «Иқтидори солонаи истеҳсолии корхонаи мазкур 100 млн. литр нӯшокист». «Ширкати Кока- кола нӯшокиҳои Тоҷикистон»  бо 44 миллион $ бунёд шуда, дар он 120 нафар бо ҷои кор таъмин гардидааст. 
    Ш. Мақсудзода афзуд, ки дар ин давра аз ҷониби  270 корхонаи саноатии пойтахт  ба маблағи беш аз 622 млн. сомонӣ маҳсулоти саноатӣ истеҳсол гардид, ки  дар қиёс нисбат ба ҳамин давраи соли  гузашта 87,1 млн. сомонӣ ё 11,7 % зиёд мебошад.