КМИР ба гузориши ниҳоии САҲА посухи расмӣ медиҳад

              Душанбе, 01.07.2015. (АМИТ «Ховар», Марзия Саидзода).-Комиссияи марказии интихобот ва раъйпурсии Тоҷикистон тасмим гирифтааст, ки гурӯҳи корӣ  таъсис диҳад. Ҳадаф аз созмон додани ин гурӯҳи корӣ омӯзиш ва омода намудани ҷавоби расмии КМИР нисбат  ба гузориши ниҳоии нозирони Дафтари ниҳодҳои демократӣ ва ҳуқуқи инсони Созмони амният ва ҳамкорӣ дар Аврупо /САҲА/  оид ба натиҷаҳои интихоботи парлумонии Тоҷикистон аст, ки 1 марти соли равон доир гардид.
             Абдуманнон Додозода-роҳбари дастгоҳи КМИР дар суҳбат ба хабарнигори АМИТ «Ховар» гуфт, ки ба ҳайати ин гурӯҳ 7 нафар аъзои КМИР ва намояндагони масъули ин ниҳод шомиланд.
          А. Додоев афзуд, ки алҳол ба таври расмӣ тавсияҳои Дафтари ниҳодҳои демократӣ ва ҳуқуқи инсони САҲА ба КМИР нарасидааст, он дар сомонаи ин ниҳод ҷой дода шудааст, ки аз 31 тавсия иборат аст. Ин тавсияҳо фарогири масъалаҳои марбут ба ташкил ва гузаронидани интихобот, ба қайд гирифтани номзадҳо ва интихобкунандагон, кор бо намояндагони васоити ахбори омма, санҷиши сатҳи забондонии номзадҳо ба вакилии Парлумон, нозирони миллӣ аз аҳзоби сиёсӣ ва  ҷомеаи шаҳрвандист.