Муроҷиатномаи Ҷамъияти тоҷикистониёни муқими Шоҳигарии Белгия

Душанбе, 31.07.2015 (АМИТ “Ховар”).- Ҷамъияти тоҷикистониёни муқими Шоҳигарии Белгия, Шоҳигарии Нидерланд ва Гертсогии Бузурги Люксембург вобаста ба офатҳои табиие, ки рӯзҳои охир дар ҷумҳурӣ рух доданд, муроҷиатнома қабул кардааст, ки дар он аз ҷумла омадааст:
«Ҳамватанони гиромӣ,
Чуноне ки хабар доред, рӯзҳои охир бинобар сабаби баланд шудани ҳарорати ҳаво ва об шудани пиряхҳо, дар минтақаҳои кӯҳии гуногуни ҷумҳуриямон ҳодисаҳои фаромадани сели шадид ва баланд шудани сатҳи дарёҳо ба амал омада истодаанд. Мутаассифона, офатҳои табиӣ ба иқтисодиёти ҷумҳурӣ ва хонаводаҳои ноҳияҳои мухталифи кишварамон зарари зиёди моддӣ расонида, ҳамчунин боиси марги ҳамватанонамон гашта истодаанд.
Ҷамъияти тоҷикистониёни муқими Шоҳигарии Белгия, Шоҳигарии Нидерланд ва Гертсогии Бузурги Люксембург чунин хабарро бо эҳсоси андӯҳ қабул намуда, омодагии худро ҷиҳати дастгирии талошҳои Ҳукумати Тоҷикистон дар ҳалли мушкилоти иҷтимоию иқтисодии баамаломада изҳор мекунад. 
Ҷамъият дар самти ҷалби кумаки моддӣ барои бартарафсозии оқибатҳои офатҳои табиӣ дар Тоҷикистон фаъолона кор бурда истодааст.
Дар робита ба ин, аз тоҷикистониёни муқими Шоҳигарии Белгия, Шоҳигарии Нидерланд ва Гертсогии Бузурги Люксембург эҳтиромона даъват ба амал меорем, ки кумаки моддии худро ба мардуми шарифи Тоҷикистон дар ин рӯзҳои душвор дареғ надоранд».
Барои маълумоти бештар аз тариқи телефони +32 2 640 69 33 бо Сафорати Тоҷикистон дар шаҳри Брюссел метавонед тамос гиред.