Саноатчиёни Суғд аз рўи ҳаҷми маҳсулоти саноатӣ ҷои аввалро гирифтанд

 Душанбе,  14.07.2015 (АМИТ «Ховар», Тоҳирҷон Искандарзода).-  Саноатчиёни вилояти Суғд дар ҷамъбасти нимсолаи аввали соли  2015 байни минтақаҳои ҷумҳурӣ аз рўи ҳаҷми маҳсулоти саноатӣ ҷои аввалро ишғол намуданд.  Истеҳсоли маҳсулоти саноатӣ дар ин давра 2,1 млрд. сомонӣ ва суръати афзоиш 128,2 фоизро ташкил додааст,-гуфт Озифхон Шарифзода, мудири шуъбаи энергетика ва саноати мақомоти иҷроияи ҳокимияти давлатии вилояти Суғд.    Рушди соҳаро аз ҳама бештар корхонаҳои саноати коркарди кўҳӣ таъмин месозанд. 
Дар нимсолаи аввали соли 2015 дар вилояти Суғд   76 корхонаву коргоҳи нави саноатӣ бо 1046 ҷои нави корӣ  ба фаъолият шурўъ намуд.  Коргоҳҳои нав асосан дар соҳаҳои саноати сабук,  хўрокворӣ  ва  масолеҳи сохтмонӣ  мебошанд. Мутобиқ ба дурнамои  рушди соҳа  саноатчиёни вилоят тасмим гирифтаанд  дар соли 2016 ҳаҷми истеҳсоли маҳсулотро ду баробар зиёд намуда, ба  6 млрд сомонӣ расонанд.