Таваҷҷуҳи хориҷиён ба меваю сабзавоти Тоҷикистон меафзояд

Душанбе, 8.07.2015. (АМИТ «Ховар», Раъно Нусратуллозода).-Меваю сабзавоти тозаи Тоҷикистон мавриди таваҷҷуҳи намояндагони  Палатаи савдо ва саноати мамолики гуногун қарор мегирад. Ин масъала зимни вохӯриҳои силсилавии раиси Палатаи савдо ва саноати Тоҷикистон Шариф Саид бо намояндагони палатаҳои савдои мамлакатҳои дуру наздик  пайваста мавриди гуфтушунид қарор дорад,- зикр шуд имрӯз зимни нишасти хабарии  Палатаи савдо ва саноати ҷумҳурӣ. 
Дар ҳақиқат  Палатаи савдо ва саноати Ҷумҳурии Тоҷикистон дар рушду таҳкими ҳамкории дуҷониба дар рушди робитаҳои тиҷоратию иқтисодӣ, ҷалби сармоя ба иқтисоди кишвар, дарёфти шарикони тиҷоратӣ, созмон додани корхонаҳои нави муштарак саҳми арзанда дорад.  
Дар айни замон барои сайқал додани дониши соҳибкорон ва ба бозори ҷаҳонӣ рақобатпазир будани маҳсулоти истеҳсолкардаи онҳо бо дастгирии Барномаи рушди Созмони Милали Муттаҳид дар Тоҷикистон мунтазам давраҳои омӯзишӣ гузаронида мешаванд.