Як шоҳзодаи Саудӣ 32 млрд доллари дороияшро ба созмонҳои хайрия мебахшад

Душанбе, 02.07.2015. (АМИТ «Ховар»). — Пойгоҳи хабарии «Тулӯъ нюс» бо такя ба гузориши хабаргузории Фаронса иттилоъ медиҳад, ки Валид ибни Талол шоҳзодаи миллиардери Арабистони Саудӣ эълом доштааст, тамоми сарвати худро  бо арзиши 32 миллиард доллари амрикоӣ сарфи фаъолиятҳои хайрия мекунад.
Шоҳзода дар баёнияи худ гуфтааст, ки ин пул барои афзоиши дарки қишрҳои мухталиф аз фарҳангҳои гуногуни онҳо, рушди ҷомеа, беҳбуди вазъияти занон дар ҷомеа, парвариши ҷавонон, имдодрасонӣ ба манотиқи маҳрум ва сохти ҷаҳонии беҳтар истифода мешавад. Ҳамчунин, ӯ афзудааст: «Ин аҳдоф бо барномарезии дақиқ ва тарҳи ҷомеъ дунбол мешавад».
Алвалид ибни Талоли  60 — сола ба ин нукта ишора кардааст, ки сарваташ ҳатто баъд аз марги вай сарфи фаъолиятҳои башардӯстона мешавад. Ӯ фарзанди Талол ибни Абдулазизи 83-сола мебошад.