Захираи маҳсулоти кишоварзӣ барои давраи тирамоҳу зимистон

Душанбе, 23.07.2015. (АМИТ «Ховар», Ситораи Боймурод).- Раёсати Иттифоқи «Тоҷикматлубот» бо мақсади захираи маҳсулоти кишоварзӣ барои давраи тирамоҳу зимистон нақшаи чорабиниҳоро тартиб додааст. Аз  тарафи кормандони ин ташкилот ба миқдори 10 ҳазор тонна молу маҳсулот, аз ҷумла  3600 тонна пиёз, 3700 тонна картошка, 200 тонна меваи тоза, 800 тонна маҳсулоти ғаллагӣ, 220 тонна зироати полезӣ ва 2230 ҳазор қуттии шартӣ консерва захира мешавад.
Аз ҷумла, барои таъмини аҳолии шаҳри Душанбе 900 тонна пиёз ва 700 тонна картошка захира мешавад. Нақшаи захираи ангишт барои ин давра 15 ҳазор тоннаро ташкил медиҳад. Бо корхонаҳои истеҳсолкунандаи ангишт ба миқдори зиёда аз 13 ҳазор тонна шартномаҳо баста шуда, ҳоло воридоти он ба соҳа зиёда аз 1600 тоннаро ташкил медиҳад.
Дар ин бора аз Раёсати Иттифоқи «Тоҷикматлубот» иттилоъ доданд.