«Зан мазҳари покизагист»-озмун бахшида ба Соли оила

Файзобод, 04.07. 2015. (АМИТ “Ховар”, Субҳониддини Маҳмуд).-   Бахши  кор бо занон  ва оилаи ноҳияи Файзобод бахшида ба эълон гардидани  Соли 2015 чун соли оила  озмунҳои «Оилаи беҳтарин», «Зан мазҳари покизагист»  ва «Гуларӯсак»-ро дар байни  гулдухтарони  ҷамоатҳои шаҳраку деҳот  ва муассисаҳои таълимии ноҳия доир намуд.
Озмунҳои мазкур барои пойдории оилаҳо,  омода  намудани духтарон  ба ҳаёти мустақилона,   танзими муносибатҳои оилавӣ, ҷалби духтарон барои  идомаи таҳсил, касбомӯзӣ, баланд бардоштани  санъату маданияти либоспӯшии занону духтарон  ва нагаравидан ба гурӯҳҳои иртиҷоию ифротгаро равона гардиданд.  
Дар озмун донишҷӯи бахши якуми Омузишгоҳи тиббии ноҳия  Лайло Раҳмонова  сазовори ҷои якум гардид. Ғолибони озмунҳо аз ҷониби Мақомоти иҷроияи ҳокимияти давлатии ноҳия бо туҳфаҳои хотиравӣ қадрдонӣ шуданд.