«Аржанг» феҳристи осор ва адабиёти шоири орифро чоп кард

 Душанбе, 05.08.2015.(АМИТ «Ховар», Марзия Саидзода).- Ба ифтихори ҷашни 700- солагии шоир ва мутафаккири бузурги Шарқ Мир Сайид Алии Ҳамадонӣ, ки соли равон бо Қарори Ҳукумати Ҷумҳурии Тоҷикистон ва ЮНЕСКО дар сатҳи балнд таҷлил мегардад, нашриёти «Аржанг»-и Душанбе феҳристи осор ва адабиёти шоирро интишор намуд. 
         Феҳрист бо теъдоди 300 адад аз ҷониби Пажӯҳишгоҳи илмию тадқиқотии фарҳанг ва иттилооти Вазорати фарҳанги кишвар ба табъ расида,  Шариф Комилзода ва Сабоҳат  Иброҳимова  мураттибони феҳристи мазкуранд. Феҳрист аз се қисм иборат буда, дар қисми якуми он номгӯи асарҳои дар шакли алоҳида чоп шуда ва намунаи ашъори дар нашрияҳои даврӣ интишоргардидаи шоир гирд оварда шудаанд. Қисми дуюми  феҳрист  адабиёти марбут  ба  ҳамадоншиносист. Инчунин дар қисми сеюми феҳрист барои осон намудани  кори пажӯҳишгарон кӯмакфеҳристҳои алифбоии асарҳо ва ашхос пешниҳод гардидааст. 
   Бояд тазаккур дод, ки  феҳрист дастнависҳои соҳибҷашн ва  маводи чопиву  электронии солҳои 1947-2015 интишорёфтаро фаро гирифта, дар асоси захираи Китобхонаи миллии Тоҷикистон, нашрияҳои библиографии Агентии милии Созмони байналмилалии  рақамгузории китоб (ISBN)- Хонаи китоби Тоҷикистон ва веб-сомонаҳои  Интернет тартиб дода шудааст.