Ба 200 хонандаи ниёзманд либосҳои мактабӣ тақдим шуд

Душанбе,  18.08.2015 (АМИТ «Ховар», Рафоати Абдулҳамид).- Бино ба иттилои Хадамоти матбуоти раиси вилояти Суғд, дар саҳни Китобхонаи оммавии ба номи Тошхоҷа Асирӣ «Ярмарка- фурӯши лавозимоти мактабӣ» ба кор оғоз намуд.
Мақомоти иҷроияи ҳокимияти давлатии шаҳри Хуҷанд бо мақсади таъмини хонандагони мактабҳо бо либоси ягонаи мактабӣ ва бедор намудани завқи зебоипарастӣ дар ниҳоди  хонандагон тасмим гирифт, ки ҳар  мактаб дар намуди алоҳида соҳиби либоси мактабии худ гардад. Чунон, ки иттилоъ доданд, дар ярмарка нархи маҳсулот нисбат ба бозор то 20 дарсад арзонтар аст.
Мутобиқи талаботи Дастурамали либоси тавсиявии хонандагони муассисаҳои таълимӣ дар ҳамкорӣ бо ҷамъиятҳои дорои масъулияташон маҳдуди “Нассоҷи Хуҷанд” “Текстил-Сити”, “Модерн”, “Шероз”, “Раҳимӣ”, “20-солагии Истиқлолият”, “Наргис”, “Асри тиллоӣ”, “Банорас”, “Парки технологии Донишкадаи политехникии Донишгоҳи техникии Тоҷикистон”, “Алёнка”, “Бофанда” ва соҳибкорони инфиродӣ “Мансурова”,  “Ҷамолов”,  “Юсупова Гулрухсор”,  “Турсунова”  ҳамаи толибилмон бо либоси мактабӣ таъмин гашта истодаанд.
Дар рафти ярмаркаи мазкур аз номи Президенти Ҷумҳурии Тоҷикистон, Ҷаноби Олӣ, мӯҳтарам Эмомалӣ Раҳмон ба 200 нафар кӯдакони камбизоат ва ятим либосҳои ягонаи мактабӣ тақдим шуд.