Н. Бордюжа: «Бори нахуст ҷаласаи Шӯрои амнияти дастаҷамъии СААД дар кишвари раёсаткунанда баргузор мегардад»

Душанбе, 19.08.2015. (АМИТ «Ховар»). — «Бори нахуст, пас аз танаффуси дуру дароз, дар кишвари раёсаткунанда ҷаласаи Шӯрои амнияти дастаҷамъии СААД баргузор мегардад», — ин матлабро Дабири кулли СААД Николай Бордюжа пас аз мулоқот бо Президенти Ҷумҳурии Тоҷикистон Эмомалӣ Раҳмон иброз дошт.
Вай афзуд, ки дар ҷараёни мулоқот бо раиси Шӯрои амнияти дастаҷамъии СААД, Президенти Ҷумҳурии Тоҷикистон Эмомалӣ Раҳмон асосан масоили омодагӣ ба ҷаласаи Шӯрои амнияти дастаҷамъӣ, ки 15-уми сентябр дар шаҳри Душанбе баргузор мегардад, баррасӣ шуданд.
Н. Бордюжа таъкид кард: ки «Имрӯз мо бо иншооти баргузории ҷаласаи Шӯрои амнияти дастаҷамъӣ ва ҷаласаи муштараки Шӯрои вазирони корҳои хориҷӣ, Шӯрои вазирони мудофиа ва Кумитаи котибони Шӯрои амнияти давлатҳои аъзои СААД шинос шудем, ки онҷо корҳои фароҳам овардани шароит барои фаъолияти сохторҳои ташкилот идома доранд».
«Масъалаи асосие, ки аз ҷониби сарони давлатҳо матраҳ мегардад — ин натиҷаи санҷиши ногаҳонии нерӯҳои дастаҷамъии вокуниши фаврӣ ба шумор меравад. Гап сари он аст, ки мо корҳои тадқиқотии зиёде гузарондем ва дар натиҷа як қатор мушкилот ошкор гардид, ки баҳри баланд бардоштани фаъолияти самараноки муштарак онҳоро ҳал бояд кард», — гуфт Николай Бордюжа.
Зимни мулоқот инчунин ба вазъияти минтақаи Осиёи Марказӣ бо назардошти тамоюли танозули вазъияти Афғонистон таваҷҷуҳи хоса зоҳир карда шуд. Дар робита ба ин, мавзӯи таҳкими марз, қӯшунҳои сарҳадӣ ва сохторҳои қудратии Ҷумҳурии Тоҷикистон матраҳ гардид.
Н. Бордюжа ҳамчунин илова намуд, ки то имрӯз қариб ҳамаи кишварҳои аъзои СААД барои таҳкими марз бо Афғонистон ба Тоҷикистон кумаки ҳарбӣ-техникӣ расондаанд.