Пешгирии қоидавайрокуниҳо

Душанбе, 12.08.2015. (АМИТ «Ховар», Ситораи Боймурод).- Тибқи иттилои Хадамоти муҳоҷирати назди Вазорати меҳнат, муҳоҷират ва шуғли ахолӣ, Прокурори нақлиёти Тоҷикистон Абдурашид Кишварзода бо роҳбарони хадамоту шуъбаҳои мақомоти дахлдори фурудгоҳи байналмилалии шаҳри Душанбе вохӯрӣ барпо намуда, дар он масъалаҳои пешгирии ҳама гуна қоидавайронкуниҳо дар фаъолияти ҳамарӯза мавриди баррасӣ қарор гирифт.
Абдурашид Кишварзода вобаста ба тамаъҷӯйӣ, риояи одоби муошират, мубориза бар зидди равандҳои террористӣ эктремистӣ, пешгирии шомил шудани ҷавонон ба гурӯҳҳои ифротгаро пешгирии ҳама гуна хурофот, баланд бардоштани ғурури миллии ҷавонон ва тарбияи ватандустӣ муфассал суханронӣ намуд. Аз ҷумла, иброз намуд, ки дарки ҳаводиси ҷаҳони имрӯз водор месозад, ки мо аз хавфу хатарҳои ба оромӣ ва суботи кишвар таҳдидкунанда огоҳ бошем.
Вобаста ба фаъолияти ниҳодҳои фурудгоҳи Душанбе таъкид гардид, ки хизматрасонӣ дар фурудгоҳҳо дараҷаи баландро доро бошанд ва намояндагони ширкатҳои ҳавопаймоӣ мусофиронро ҳурмату эҳтиром номоянд. Мусофир бояд аз таҳқиру озор озод бошад ва худро шаҳрванди комилҳуқуқ ва зери ҳимояи қонун ҳис намояд.