Сокини ноҳияи Шӯрообод бо қариб 100 кг афюн дастгир гардид

Душанбе, 14.08.2015. (АМИТ «Ховар», Лайло Тоирӣ). — Кормандони Агентии назорати маводи нашъаовари назди Президенти ҶТ дар аввали моҳи июл хабари фаврӣ гирифтанд, ки шаҳрвандони Афғонистон ният доранд миқдори калони маводи нашъаоварро ба сокини ноҳияи Шӯрообод фурӯшанд. 
Дар назди деҳаи Анҷироб кормандони агентӣ мехостанд  мошини «Нива»-ро боздошт кунанд, вале ронанда суръатро баланд намуда,  хост пинҳон шавад. Кормандони агентӣ мошинро таъқиб намуданд. Ронанда дар ҷои беодам аз мошин  баромада, ба ҷои номаълум ғайб зад. 
Кормандони агентӣ мошинаро ба шаҳри Кӯлоб оварда,  дар бинои Шуъбаи байниноҳиявӣ аз назар гузарониданд. 
Дар дохили он якчанд борхалта бо маводи дорои  бӯи махсус дарёфт гардид.  
Тавре  ки мутахассисони Шуъбаи ташхиси  судии агентӣ муайян намуданд, маводи ошкоршуда афюн буда, вазни он 98 кг 658 граммро ташкил дод.
Дар  натиҷаи гузаронидани чорабиниҳои фаврю ҷустуҷӯӣ 12 август сокини 53-солаи ноҳияи Шӯрообод дастгир гардид, ки ронандаи  мошини партофта ва аз таъқиб пинҳонгардида буд ва  то ҳол дар ҷустуҷӯ қарор дошт. 
Бино ба иттилои хадамоти матбуоти агентӣ, ҳоло шахсияти шаҳрвандони Афғонистон, ки маводи нашъаоварро ба ӯ фурӯхтаанд, муайян шуда истодааст.
Аз рӯи ҳодисаи мазкур парвандаи ҷиноӣ оғоз гардида, тафтишот давом дорад.