Толибон амалҳои гурӯҳи ифротгарои ба ном «Давлати Исломӣ»-ро шадидан маҳкум намуданд

  Душанбе, 12.08. 2015 (АМИТ «Ховар», Саидҷаъфар Ашӯрзод).- Роҳбарияти гурӯҳи  «Толибон» баъд аз пахши навори навбатии гурӯҳи ифротгарои ба ном «Давлати исломӣ», ки дар он қатли асирон намоиш дода  шудааст, вокуниш нишон дода, онро сахт маҳкум намудааст. 
Тавре, ки хабаргузории Рейтер иттилоъ додааст, чанде қабл ифротгароёни гурӯҳи ба ном «Давлати исломӣ» бо бераҳмии махсус як гурӯҳ асирони афғонро ба қатл расонида навори онро дар сомонаҳои интернетӣ ҷой дода буданд. Толибон изҳор доштаанд, ки «ин гуна ҷазо ва чунин амалҳои бераҳмонаи дигар аз номи дини муқаддаси ислом ва мусулмонон қобили қабул нест». 
Гуфта мешавад, ин ду гурӯҳ нисбат ба якдигар ҷиҳод эълон намуда, чандин маротиба ба муқобили ҳам вориди майдонҳои  набард шудаанд.