Туркманистон ва Тоҷикистон дар бисёр масоили минтақавию ҷаҳонӣ, бахусус ҳифзи амну субот мавқеи ҳамсон доранд

Душанбе, 20.08.2015. (АМИТ «Ховар»). — Ин нуқтаро зимни мулоқот бо Президенти Ҷумҳурии Тоҷикистон Эмомалӣ Раҳмон, ки бо сафари расмӣ дар шаҳри Ашхобод қарор дорад, Президенти Туркманистон Гурбонгулӣ Бердимуҳаммадов таъкид дошт.
Президенти Туркманистон аз ҷумла гуфт: “мо сафари расмии шуморо ба кишвари худ басо муҳим мешуморем, зеро Туркманистон ва Ҷумҳурии Тоҷикистон дар бисёр масоили минтақавию ҷаҳонӣ, ба хусус дар бахши ҳифзи амну субот ва сулҳу салоҳ мавқеи ҳамсон доранд”. 
Президенти Ҷумҳурии Тоҷикистон Эмомалӣ Раҳмон мавқеи ҳамсону ягона доштани Тоҷикистону Туркманистонро доир ба аксари масоили байналмилалӣ, аз ҷумла дар самти муқовимат бо терроризму ифротгароӣ ва дигар хатарҳои ҷаҳонӣ басо муҳим номида, таъкид дошт, ки чунин мавқеъгирӣ заминаи хубе аст барои густариши робитаҳои сиёсӣ, иқтисодию тиҷоратӣ, сармоягузорӣ ва маърифатию фарҳангӣ.