Як сокини ноҳияи Варзоб бо зану ду фарзандаш ба Сурия рафтааст

Душанбе, 7.08.2015. (АМИТ «Ховар», Лайло Тоирӣ).- Дар  ҷангҳои давлати Сурия аз  ноҳияи Варзоб чор нафар, ду нафар аз ҷамоати Чорбоғ иштирок дошта, як нафар бо ҳамроҳии зану ду фарзандаш рафтааст. Ин нукта  зимни вохӯрии кормандони  Кумитаи кор бо занон ва оилаи назди Ҳукумати Ҷумҳурии Тоҷикистон дар ноҳияи Варзоб бо  занону ҷавонон ва раисони ҷамоатҳои Лучоб ва Чорбоғ қайд гардид. 
Бино ба гуфтаи масъулони Кумитаи кор бо занон ва оила, дар вохӯрӣ аз ҷумла масъалаи пешгирии шомилшавии ҷавонон ба ҳар гуна хизбу ҳаракатҳои радикалӣ, экстремистӣ, террористӣ, пешгирии ҷинояткорӣ миёни занону духтарон ва наврасон, оид ба нигоҳ доштани фарҳанги миллӣ баррасӣ шуд. Дар бобати  ин масъалаҳо кормандони Кумитаи кор бо занон ва оилаи назди Ҳукумати Ҷумҳурии Тоҷикистон,  намояндаи Агентии маводи нашъаовари назди Президенти Ҷумҳурии Тоҷикистон, муовини Раиси ноҳия, сармутахассиси бахши кор бо ҷавонон, варзиш ва сайёҳии ноҳия ва Раиси ҷамоати Лучоб андешаҳояшонро иброз намуданд.