Захираи тухмии ғалладона ва лубиё

Душанбе, 10.08.2015. (АМИТ «Ховар», Ситораи Боймурод).- Тибқи маълумоти Раёсати тухмипарварӣ ва дастовардҳои селексионии Вазорати кишоварзии Ҷумҳурии Тоҷикистон охири моҳи июли соли равон  мутахассисони вазорат дар якҷоягӣ бо мутахассисони раёсатҳои кишоварзии вилоятҳо ва шаҳру ноҳияҳо дар хоҷагиҳои деҳқонӣ  ва ҷамоавии ҷумҳурӣ тибқи назардошти захираи тухмии зироатҳои ғалладона,  лубиё ва хўроки чорво санҷишҳои ҳосили соли 2015-ро муайян намуданд.
Ба иттилои манбаъ, дар асоси маълумоти ҷамъбастӣ ҳосили интизории майдони кишти тухмии зироатҳои ғалладона ва лубиё, инчунин хўроки чорво барои соли 2015 ҳамагӣ 60011,8 тоннаро ташкил медиҳад. Аз миқдори умумии тухмиҳои захирагардида, ғалладонагиҳо-59900,9 тонна, аз ҷумла гандум-50819,5 тонна, ҷав-8330,5 тонна, лўбиёгиҳо-710 тонна, ҷуворимакка-41 тонна ва юнучқа-110,9 тоннаро ташкил додааст.
Аз миқдори умумии зироатҳои барои тухмии санҷишҳои ҳосили интизорӣ (апробатсия) шуда, асосашро гандуми тухмӣ ташкил медиҳад, ки назардошти он дар соли 2015 дар вилояти Суғд-9156,2 тонна, вилояти Хатлон-31059,7 ва ноҳияҳои тобеи марказ-10603,6  ва дар ҷумҳурӣ 50819,5 тоннаро ташкил медиҳад.
Натиҷаи ҷамъбасти апробатсияи гузаронидаи мутахассисони соҳа дар вилояти Суғд нишон дод, ки захираи тухмии зироатҳои кишоварзӣ ҳамагӣ 13991,6 тонна буда,  муайян карда шудааст, ки нисбат ба ҳамин давраи соли гузашта 601,4 тонна (104,5%) зиёд мебошад. Инчунин, дар вилояти Хатлон миқдори захираи тухмии ғалладона 33928,1 ва дар ноҳияҳои тобеи ҷумҳурӣ 12390 тоннаро ташкил медиҳад.