«24-солагии Истиқлолият»- Боғи нави фарҳангию фароғатӣ

 Душанбе, 16.09.2015. (АМИТ «Ховар»).- Бо дастгирии мақомоти иҷроияи шаҳри Қайроққум  ва кумаки соҳибкорону корхонаҳо дар маркази шаҳр боғи нави замонавӣ ба таври ҳашар бунёд ёфт.   
Боғи навбунёд дар масоҳати ҳафт ҳазор метри мураббаъ сохта шуда, аз маҷмааи фаввораҳо, нишастгоҳу гузаргоҳҳои замонавӣ, шаршараву гулгашт ва саҳнаи барҳаво иборат мебошад. Раиси вилоят Абдураҳмон Қодирӣ ин рӯйдоди муҳими фарҳангиро барои сокинони шаҳр таҳният гуфта,  пешниҳод намуд, ки боғи нав «24-солагии Истиқлолият» номгузорӣ  шавад.
Тавре ки ба АМИТ «Ховар» иттилоъ доданд, ифтитоҳи макони бошукӯҳи фароғатӣ  боиси хушнудиву нишоти ҷавонону наврасони ин шаҳри дӯстии халқҳо гардид. Сокинони  соҳили «Баҳри тоҷик аз вусъати корҳои ободониву созандагӣ дар шаҳр изҳори қаноатмандӣ карда, таъкид намуданд, ки ин ҳама пешрафту шукуфоӣ маҳз ба туфайли неъмати гаронбаҳо -Истиқлолият ва Ваҳдату ягонагӣ ба даст меояд.