Академик М.Ёқубова: «Нооромӣ ва бесарусомонӣ на танҳо ба сиёсату иқтисоду иҷтимоиёти ҷомеа таъсири манфӣ мерасонад, балки рушди илмро боздошта, сатҳи фарҳангу маданиятнокиро паст мебарад»

Душанбе, 21.09.2015, (АМИТ «Ховар»). — Ноиби Президенти Академияи илмҳои ҷумҳурӣ, академик Муҳиба Ҳусейновна Ёқубова дар қатори дигар олимону зиёиёни мамлакат ҷиноятҳои содиркардаи хоинонро таҳти роҳбарии собиқ муовини вазири мудофиа Абдуҳалим Назарзода, ки боиси марги одамон гардид, сахт маҳкум мекунад. Муҳиба Ёқубова чунин мешуморад, ки оромӣ ва осудагӣ дар ҷомеа аз шартҳо ва омилҳои асосӣ барои рушди илму фарҳанг мебошад, зеро нооромӣ ва бесарусомонӣ на танҳо ба сиёсату иқтисоду иҷтимоиёти ҷомеа таъсири манфӣ мерасонад, ҳамчунин рушди илмро боздошта, сатҳи фарҳангу маданиятнокиро паст мебарад. «Олимони шуъбаи биология ва тибби Академияи илмҳо дар баробари он, ки ҷиноятҳои содиршударо маҳкум мекунанд, ҳамчунин пешниҳод доранд, ки ҳамин масъала, яъне омилҳо ва заминаҳои сар задани чунин ҷинояти вазнин дар миёни донишҷӯёну аспирантҳо ба таври васеъ фаҳмонида шавад. Сиёсати интихобкардаи Сарвари давлат, ки моҳияти аслии он сулҳу ваҳдатофарӣ мебошад, дар ҳама маҳфилҳо тарғибу ташвиқ шуда, амалан ҳар як сокини бофарҳанг бояд онро дастгирӣ кунад ва бо ҳамин пеши роҳи такрор шудани воқеаҳои нангине, ки хоинон содир карданд, гирифта шавад» — гуфт М. Ёқубова ва илова кард, ки : «Он рӯзҳои сиёҳу бадеро, ки солҳои 90-ум ба сари миллати тоҷик омада буданд, мо то ҳоло фаромӯш накардаем. Кас тааҷҷуб аз он мекунад, ки шахсе даст ба ҷиноят зад, ки ягон мушкилии молиявӣ ва ё иқтисодӣ надошт».
«Ба ин шахс чӣ намерасид? Вазифа, рутба, пулу молу сарвату давлат дошт. Пас ӯ чӣ мехост? Ин аз он шаҳодат медиҳад, ки воқеан ҳам душманони миллати тоҷик то ҳоло дар бағал санг гирифта, дар камин нишастаанд. Онҳо ободиву шукуфоии Тоҷикистонро дидан намехоҳанд ва барои расидан ба ғаразҳои сиёҳи худ аз ягон амал, ҳатто аз гирифтани силоҳ ба муқобили Ватану халқи худ шарм намедоранд. Албатта, роҳбарон, иҷрокунандагон, маслиҳатгарони ин амали ҷинояткорона бояд ҷазо дода шаванд. Илова ба ин давлатдорону сиёсатдоронро мебояд ин ҳодисаи нангини рухдодаро ҳаматарафа омӯзанд ва ба он баҳои ҳақиқӣ диҳанд».
-Мо, олимону донишмандон, зиёиён, донишҷӯён, аспирантон ва ҳар як корманди соҳаи илмро мебояд сулҳу оромиву осоиштагии Ватанро мисли гавҳараки чашм ҳимоят кунем ва бо ҳамин дар рушди илму фарҳангу маданияти миллатамон саҳми муносиб гузорем, — таъкид  кард  академик М.Ёқубова.