Беларус ба Тоҷикистон 6 мошини борбардор тақдим кард

Душанбе, 28.09.15. (АМИТ «Ховар»). – Дар  шаҳри  Душанбе   маросими ба  Тоҷикистон супурдани 6 мошини  борбардори  тамғаи «МАЗ» ҳамчун ёрии башардӯстонаи Ҷумҳурии  Беларус  баргузор гардид. Мошинҳои  зикршуда барои  рафъи  оқибатҳои  офати табиӣ дар  ВМКБ  истифода  мешаванд.
Назар  ба  хабари  ВКХ Ҷумҳурии  Беларус,  ёрии  хайрхоҳона   бо  дастури Президенти ин  кишвар А.Лукашенко  сурат  гирифтааст. 
Дар маросими супоридани  мошинҳо  муовини  директори Агентии захираҳои  давлатии  моддии  наздии Ҳукумати  Тоҷикистон  Соҳибҷон Зиёдуллоев,  сафири  Беларус  дар  Тоҷикистон  Олга  Гаврук, муовини директори бахши  тиҷорати  Ҷамъияти саҳҳомии кушодаи «МАЗ» Василий Кохович  ширкат  доштанд. 
Мошинҳои борбардори сохти Беларус  барои  барқарор  намудани  биноҳои аз  таъсири офати табиӣ  харобшуда,  инфрасохтор  ва  таъмири  роҳҳои  мошингарди  ноҳияҳои  осебдида  мавриди  истифода  қарор  мегиранд.