Хатлон: зӯроварӣ дар оиларо пешгирӣ мебояд!

Душанбе, 15.09.2015. (АМИТ «Ховар», Анвари Неъмат).- Дар Прокуратураи вилояти Хатлон бо ибтикори Шӯрои ҳамоҳангсозии мақомоти ҳифзи ҳуқуқ ҷаласаи ҳайати мушовара доир гардид, ки дар он масъалаи зиёд шудани дуздӣ ва сабабҳои ба худкушӣ даст задани шаҳрвандон таҳлилу баррасӣ шуданд. Масъулон ибрози нигаронӣ карданд, ки ҷинояти дуздӣ тамоюли болоравӣ дошта, 71-ҳолати ин ҷиноят ҳанӯз нокушода боқӣ мондааст. Ҳолати дуздӣ бештар дар маркази вилояти Хатлон-шаҳри Қурғонтеппа ба қайд гирифта шудааст. Вобаста ба масъалаҳои мазкур таъкид гардид, ки барои ҷилавгирӣ аз ин гуна амали номатлуб бояд 301 нозири минтақавӣ фаъолияти хешро пурзӯр намуда, дар байни мардум мурофиаҳои сайёри судӣ созмон диҳанд.  
Дар ҷаласа барои пеншгирии ин масъала чанд омил  пешниҳод гардид. Аз ҷумла,  волидайн дар тарбияи фарзандон масъулияти бештар дошта бошанд, зӯроварӣ дар хонавода пешгирӣ шавад, ҳамчунин дар барномаи таълимии муассисаҳо омӯзиши фанни равоншиносӣ илова гардад.