Иқдомоти Тоҷикистону Русия барои ҳалли масоили бахши муҳоҷират

Душанбе, 23.09.15. (АМИТ «Ховар»). — Дар ҷараёни ҷаласаи  11 —  уми   гурӯҳи  муштараки  кории  Тоҷикистону  Русия   масоили  марбут ба иҷрои Созишномаи  байни ҳукуматҳои  Ҷумҳурии  Тоҷикистон  ва  Федератсияи  Русия  дар  бораи  фаъолияти  меҳнатӣ ва  хифзи  ҳуқуқҳои  шаҳрвандони  Тоҷикистон  дар  Русия  ва  шаҳрвандони  Русия  дар  Тоҷикистон  мавриди  муҳокима  қарор  гирифтанд. 
Тоҷикистонро  дар  ҷаласа  муовини  вазири  меҳнат,  муҳоҷират ва шуғли  аҳолии  Тоҷикистон  Нурулло Маҳмадуллоев  ва  Русияро   муовини   роҳбари Хадамоти  федералии  муҳоҷирати  ин  кишвар  Вадим  Яковенко   намояндагӣ  намуданд. 
Дар  ҷаласа  ҷараёни  иҷрои  қарорҳои иҷлосияи   даҳуми  гурӯҳи  муштараки  кории  Тоҷикистону  Русия, вазъи муҳоҷирати  меҳнатӣ,  ҷараёни иҷрои  корҳо  ҷиҳати  таҳияи Созишномаи  байни ҳукуматҳои  Тоҷикистону  Русия  дар  бораи  фаъолияти  минбаъда  ва протоколи  иҷроия дар  бораи  тартиби  татбиқи он  мавриди  муҳокима  қарор   гирифт.
Ҷонибҳо  ҳамчунин   лоиҳаи Созишнома  дар  бораи  интихоби  муташаккилонаи   шаҳрвандони  Тоҷикистон  барои   иҷрои  кори  муваққатӣ  дар қаламрави  Русияро баррасӣ  намуданд. Дар  анҷоми  мулоқот  тасмим  гирифта  шуд, ки ба татбиқи расмиятҳои байнидавлатӣ ҷиҳати  ба  имзо расонидани Созишномаи  ҳамкорӣ  дар  бахши  муҳоҷират  шурӯъ  карда,  лоиҳаи   Созишнома дар  бораи  интихоби  муташаккилонаи  шаҳрвандони  ҶТ барои иҷрои  кори  муваққатӣ  дар қаламрави  Русия такмил  дода шавад. 
Бо  қарори  ҷонибҳо  ҷаласаи  навбатии  гурӯҳи  муштараки  корӣ дар семоҳаи  дуюми  соли  2016  дар  шаҳри  Душанбе  доир  мегардад.