Мукофотҳои Сарвари давлат ва Вазири корҳои дохилӣ ба кормандони мақомоти корҳои дохилӣ

Душанбе, 10.09.2015. (АМИТ «Ховар»). — Бо фармони Вазири корҳои дохилии Ҷумҳурии Тоҷикистон бахшида ба ҷашни 24-умин солгарди истиқлолияти давлатӣ 380 нафар кормандони мақомоти корҳои дохилӣ қадршиносӣ карда шуданд. Cубҳи имрӯз дар Вазорати корҳои дохилии мамлакат бахшида ба 24-умин солгарди Истиқлолияти давлатии Ҷумҳурии Тоҷикистон бо иштироки Котиби Шӯрои амнияти ҶТ Қаҳҳоров Абдураҳим тантанаҳои идона баргузор гардиданд. Вазири корҳои дохилӣ Раҳимзода Рамазон гуфт, ки «Истиқлолият барои   тоҷикон беҳтарин дастовард, арзиши олии давлатдорӣ, нангу номуси ватандорӣ, ифтихор аз таъриху тамаддун ва фарҳанги бою оламшумули аҷдодӣ ба шумор меравад. Саҳми кормандони мақомоти корҳои дохилӣ барои таҳкими истиқлолият  назаррас буда, беш аз 2000 кормандони мақомоти корҳои дохилӣ ҷони худро ба хотири таҳкими амнияту оромии шаҳрвандон ва рафъи хатару таҳдидҳои душманони миллат аз даст доданд, ки хотираи неки онҳо ҳеҷ гоҳ фаромӯш нахоҳад шуд». Аз ҷумла хотираи онҳое, ки дар натиҷаи амалиёти террористии гурӯҳи ҷиноятпешаи ҳоҷӣ Ҳалим ҷони худро аз даст додаанд, ҷовидона ба ёдгор хоҳад монд.
Котиби Шӯрои амният Абдураҳим Қаҳҳоров ба муносибати 24-умин солгарди  Истиқлолияти  давлатии  Тоҷикистон аз номи Президенти мамлакат ба як қатор кормандони мақомоти корҳои дохилӣ мукофотҳои давлатӣ тақдим намуд. Аз ҷумла бо Фармони Сарвари давлат чор афсари ВКД бо медали «Ҷасорат» ва 11 нафар кормандони мақомоти корҳои дохилӣ бо Ифтихорномаи Ҳукумати Ҷумҳурии Тоҷикистон сарфароз гардонида шуданд.
Тавре ки аз ВКД ҶТ иттилоъ дода шуд, бо фармони вазири корҳои дохилӣ як қатор кормандони мақомот барои хизмати софдилонаву содиқона, маҳорату малакаи баланди касбӣ дар муҳофизати тартиботи ҷамъиятӣ, волоияти қонун, пешгирӣ ва ошкор намудани ҷиноят бо рутбаҳои навбатӣ, медалу нишони сарисинагӣ, ифтихорнома, сипоснома ва маблағи пулӣ мукофотонида шуданд.