Намоиши аксҳо дар “Қасри миллат”

Душанбе,15.09.2015. (АМИТ “Ховар”). —  Тавре ки ба АМИТ “Ховар” иттилоъ доданд, қабл аз баргузории ҷаласаи Шӯрои амнияти дастаҷамъии СААД дар саҳни “Қасри миллат” барои президентони кишварҳои аъзои СААД: Арманистон — Серж Саргсян, Беларус — Александр Лукашенко, Қазоқистон — Нурсултон Назарбоев, Қирғизистон — Алмазбек Атамбоев ва Федератсияи Русия — Владимир Путин аз тарафи Агентии назорати маводи нашъаовари назди Президенти Ҷумҳурии Тоҷикистон намоиши аксҳо баргузор  шуд.
Намоиши аксҳо таҳти унвони “СААД — сипари боэътимод дар роҳи интиқоли маводи мухаддир” ҷараён гирифта, он машқҳои “Раъд-2015”-ро, ки аз 24 август то 4 сентябри соли равон дар ҳудуди Тоҷикистон бо иштироки ниҳодҳои кишварҳои аъзои СААД дар ду марҳила баргузор гардида буд, инъикос менамояд. Дар қисмати дуюми намоиши аксҳо, ки таҳти унвони “Тоҷикистон дар хатти аввали мубориза бар зидди маводи мухаддир” мегузарад, нишон дода мешавад, ки кишвари мо дар давоми 15 соли охир аз муомилоти ғайриқонунӣ 110 тонна маводи мухаддир, аз ҷумла 34 тонна героин ва 38 тонна афюнро мусодира кардааст.