Роҳбарони бозорҳо оид ба захираи маҳсулоти озуқа гузориш медиҳанд

     Душанбе, 26.09.2015.(АМИТ «Ховар», Марзия Саидзода).- Интизор меравад, ки дар ҷараёни иҷлосияи сеюми Маҷлиси вакилони халқи шаҳри Душанбе, ки 1 октябр доир мегардад, номи баъзе аз маҳаллаю кӯчаҳои пойтахт  тағйир дода шавад. Дар иҷлосия ҳамзамон доир ба омодагии бахшҳои иқтисодию иҷтимоии пойтахт ба мавсими тирамоҳу зимистони солҳои 2015-2016 Ашурбег Расулов -муовини  аввали раиси шаҳри Душанбе гузориш медиҳад. 
Инчунин дар назди вакилон муовинони раиси шаҳр Ш. Мақсудзода ва Ш. Самадов доир ба риояи талаботи қонунгузории зиддиинҳисорӣ дар мавриди таъмини рақобати солим ва ҳимояи ҳуқуқи истеъмолкунандагон дар субъектҳои таъминкунандаи барқ, оби ошомиданӣ, неруи гармӣ, партовбарорӣ ва хизматрасонии коммуналӣ ва иҷрои қарори раиси шаҳр  «Дар бораи тасдиқи Нақшаи чорабиниҳо ҷиҳати ба роҳ мондани коркарди пурраи ашёи хоми ватанӣ ва истеҳсоли маҳсулоти ниҳоӣ дар корхонаҳои шаҳри Душанбе барои солҳои 2015-2016» ҳисобот медиҳанд. Дар иҷлосия гузориши роҳбарони бозорҳои «Деҳқон», «Саховат», «Шоҳмансур» ва корхона «Оид ба истеҳсол, харид, захира ва фурӯши маҳсулоти ниёзи аввалия дар шаҳри Душанбе» дар бораи ташкили захираи маҳсулоти озуқаворӣ дар пойтахт шунида мешавад. Дар фарҷоми иҷлосияи тасдиқи як силсила  қарорҳои раиси шаҳри  Душанбе аз ҷониби вакилони шаҳрӣ дар назар аст.