Ярмаркаи маҳсулоти ниёзи мардум дар арафаи Иди Қурбон

Душанбе, 22.09.2015, (АМИТ «Ховар», Лайло Тоирӣ). — Имрӯз, 22 сентябр  бо ташаббуси роҳбарияти  Вазорати корҳои дохилӣ дар шафати бинои вазорат ба муносибати фарорасии «Иди Қурбон» ярмаркаи фурӯши маҳсулоти хоҷагии қишлоқ барои ҳайати шахсии Вазорати корҳои дохилӣ ва Кумитаи давлатии амнияти миллӣ доир гардид.
Дар ярмаркаи мазкур маҳсулоти хӯрокворӣ аз хоҷагиҳои ёрирасони Вазорати корҳои дохилӣ, хоҷагиҳои деҳқонии шаҳру ноҳияҳои вилояти Хатлон, минтақаи Рашт ва ноҳияҳои тобеи марказ пешниҳод  шуданд. Меваю сабзавоти тоза- себу ангур, ноку шафтолу ва дигар маҳсулоти мавриди ниёзи мардум: пиёзу картошка, караму сабзӣ, биринҷ, нахӯд, гӯшту тухм, асал, тарбуз, каду, сабзаҷот дар муқоиса бо нархи бозор 50 %  арзонтар пешкаши харидорон гардиданд.
Дар ярмаркаи мазкур 70 тонна маҳсулоти хоҷагии қишлоқ пешкаш гардида, нархи як килограмм гӯшт 20 сомонӣ, асал аз 20 то 30 сомонӣ, биринҷ 5 сомонӣ, себу нок ва ангур аз 2 то 5 сомонӣ, картошкаю пиёз ва сабзӣ бо нархи 1 сомонӣ, тарбуз, каду 2-3 сомонӣ, 1 дона тухм 40 дирамро ташкил медод.