Забоншиносон перомуни суннати номгузорӣ табодули назар менамоянд

 Душанбе, 15.09.2015.(АМИТ «Ховар», Марзия Саидзода).-«Номҳои ҷуғрофӣ ва суннати номгузорӣ»-  таҳти чунин унвон охири моҳи сентябр дар Душанбе конфронси ҷумҳуриявӣ  доир мегардад. Кумитаи забон ва истилоҳоти назди Ҳукумати Ҷумҳурии Тоҷикистон аз созмондиҳандагони ин ҳамоиш маҳсуб мешавад. 
      Чорабинӣ  ба Рӯзи забони  давлатӣ, ки ҳамасола 5 октябр ҷашн гирифта мешавад, бахшида шуда, дар он намояндагони вазорату идораҳои кишвар, донишмандон ва забоншиносон иштирок менамоянд. Интизор меравад, ки дар ҳамоиш масоили марбут ба рушди забони давлатӣ, ҳифзи он дар шароити ҷаҳонишавӣ ва ташаккули суннати номгузорӣ дар кишвар матраҳ гарданд.
    Бояд тазаккур дод, ки ҳанӯз 26 сол муқаддам — 22 июли соли 1989 Шӯрои Олии Ҷумҳурии Тоҷикистон Қонун  «Дар бораи забони давлатии Ҷумҳурии Тоҷикистон»-ро қабул кард ва тибқи он ба забони тоҷикӣ, ки аз муқаддасот ва рукни асосии давлатдорист,  мақоми давлатӣ дода шуд.