Ҳадафи «Cозандагони Ватан»-огоҳ сохтани ҷавонон аз хатарҳои замони муосир

Душанбе, 07.10.2015. (АМИТ «Ховар»).-Тавре ки маълум аст, яке аз вазифаҳои аввалиндараҷаи ТҶҶ «Созандагони Ватан» тарбия намудани ҷавонон дар руҳияи ватандўстӣ, пос доштани арзишҳои миллию давлатӣ, сафарбар намудани қувваи созандаи онҳо ба корҳои хайри ҷамъиятӣ ва огоҳ намудани онҳо аз хатарҳои замони муосир, ки бештар вақт ба рўҳияи ҷавонон таъсири манфӣ мерасонанд, иборат мебошад.
ТҶҶ «Созандагони Ватан» тасмим гирифтааст, ки марҳилаи дуюми чорабиниҳои худро бо мақсади  пешгирии гароиши ҷавонон ба гурӯҳҳои ғайриқонунии фаъолияташон мамнуъ оғоз намояд. Бо ин мақсад ба силсилаи мулоқот бо донишҷӯёни макотиби олии кишвар оғоз бахшида шуд.  
Дар толорҳои Донишгоҳи Давлатии Хучанд ба номи академик Бобоҷон Ғафуров ва Донишгоҳи давлатии бизнес, сиёсат ва ҳуқуқи Ҷумҳурии Тоҷикистон мулоқоти роҳбарияти ТҶҶ «Созандагони Ватан» бо донишҷӯёни ин макотиби олии кишвар баргузор шуданд.
Зимни суҳбатҳо, ки дар руҳияи озоду созгор баргузор гардиданд, ба донишҷӯён ҳадафҳои шуми стратегии ҳизбу гурўҳҳои экстремистию террористӣ фаҳмонида шуда,  омилҳои таъсиррасон ба тафаккури ҷавонон ва роҳҳои пешгирӣ аз ин таъсирҳои манфӣ баён шуданд.