Ҷавонони Кӯлоб: Ҳар гуна амали нангину ноҷавонмардонаро маҳкум мекунем

Душанбе, 05.10.2015 (АМИТ «Ховар»).-Бо баргузории як чорабинӣ дар толори Донишгоҳи давлатии Кўлоб вохӯрии раиси Кумитаи ҷавонон, варзиш ва сайёҳӣ Аҳтам Абдуллозода бо фаъолҷавонони шаҳри Кўлоб баргузор шуд. 
Дар мулоқот ба масъалаҳои пешгирии ҷавонон аз шомилшавӣ ба ҳизбу ҳаракатҳои тундгаро, маърифати фарҳанги либоспӯшӣ, баланд бардоштани ҳисси ватандўстиву ватанпарварии ҷавонон таваҷҷуҳ зоҳир шуд. 
Таъкид гардид, ки имрўз бо шарофати Истиқлолият ва Ваҳдати миллӣ Тоҷикистон ободу зебо гардида, ҷавонон озодона ба фаъолият ва таҳсил машғуланд. Гуфта шуд, ки дар ин давра ҷавонон бояд бештар ба корҳои хуб машғул гардида, баҳри ҳифзи Ватан ва муқаддасоти миллӣ кӯшиш ба харҷ диҳанд
Ҳамзамон зимни мулоқот як гурӯҳ чавонони фаъол доир ба мавзӯъҳои «Хиёнат ба Ватан», «Пешгирӣ аз нашъамандӣ» ва дигар мавзӯъҳои мавриди назарашон сухан гуфта, изҳор доштанд, ки ҳар гуна амали нангину ноҷавонмардонаеро, ки ба муқобили давлат равона гардидааст, маҳкум менамоянд. Ҷавонони фаъол ҳамсолони худро ба муттаҳидӣ ва ҳифзи ҳимояи марзу буми кишвар  даъват намуданд. 
Дар ин бора Наврӯз Қурбонов, мутахассиси пешбари бахши таҳлилу иттилооти Кумитаи ҷавонон, варзиш ва сайёҳӣ иттилоъ дод.