Ҷавонони раштӣ бо амри дил хизмати Ватанро ихтиёр карданд

Рашт, 06.10.2015 (АМИТ Ховар).—Нахустин гурӯҳи наваскарон аз ҳисоби ҷавонони водии Рашт ба сафи Қувваҳои мусаллаҳи Ҷумҳурии Тоҷикистон сафарбар   шуданд. Ба ин муносибат дар ҳамаи ноҳияҳои  водии Рашт бо ҳузури  ҷавонон, афсарону сарбозон, фаъолони  ноҳияҳо чорабинии тантанавӣ баргузор гардид.   Имрӯз қисми зиёди ҷавонони  водии Рашт бо дарки масъулияти фарзандӣ ва амри дилу виҷдон хизмати Модар-Ватанро ихтиёр намудаанд. Хотиррасон мешавем, ки бо Фармони Сарфармондеҳи Олии Ҷумҳурии Тоҷикистон мавсими даъвати наваскарон ба сафи Қувваҳои мусаллаҳ аз 1-уми октябри соли равон оғоз шуда, аллакай ба сафи Қувваҳои мусаллаҳи Тоҷикистон аз ноҳияҳои Рашт 30 нафар, Нуробод 16 нафар,  Тавилдара 15 нафар, Тоҷикобод  14 нафар ва Ҷиргатол 12 нафар бо хоҳиши худ сафарбар шуданд, ки аксари онҳо дорои маълумоти олӣ ва миёнаи касбӣ буда, дар миёни онҳо ҷавонони соҳибҳунар низ ҳастанд. 
Дар чорабиниҳои тантанавӣ бо ҳузури даъватшавандагон, падарону  модарон ва  пирони рӯзгордида суҳбатҳо  баргузор гардиданд.