Хоруғ, 30. 10. 2015. (АМИТ «Ховар»).- Ҷаласаи назди раиси Вилояти Мухтори Кӯҳистони Бадахшон Шодихон Ҷамшед масоили пешниҳод кардани ҳисоби аниқи хисороти аз зилзила воридшуда, расонидани кумак барои барқарор кардани биноҳо ва дастрас намудани масолеҳи сохтмонӣ ба хоҷагиҳои зарардидаро мавриди баррасӣ қарор дод. Зикр гардид, ки комиссияи ситоди доимӣ барои муайян кардани зарар ва расонидани кумак маълумоти аниқро ба мақомот пешниҳод намояд.
Раиси вилоят Шодихон Ҷамшед оид ба бартараф намудани оқибати офати табиӣ аз масъулин ҳисоби аниқи хисоротро тақозо намуд.
Иброз дошт, ки гурӯҳи корие, ки таъсис шудааст, барои ҳарчи тезтар муайян кардани хисорот ва расонидани кумак ба хоҷагиҳои зарардида ба мақомот ҳисобот пешниҳод намоянд. Ба Агентии захираҳои моддии давлатӣ супориш дода шуд, то сари вақт масолеҳи сохтмониро барои хоҷагиҳо дастрас намояд.
Дар ҷаласа сардори ситоди ҳолатҳои фавқулода ва мудофиаи шаҳрвандии вилоят Дусталӣ Худоёров аз хусуси хисороти аз зилзила дар миқёси вилоят ба амал омада маълумот дода, зикр кард, ки то имрӯз тибқи ҳисоботи ситоди ҳолатҳои фавқулода ва мудофиаи шаҳрвандӣ аз офати табиӣ дар миқёси вилоят 9 хона пурра хароб гардида, 31 хона қисман тахриб шудаанд. Аз ҷумла, дар ноҳияи Ишкошим ба 16 хонаи истиқоматӣ, бинои мактаби 42- и ноҳия ва бинои истеҳсоли неругоҳи обии Намадгути ноҳия зарар расидааст.
Ҳисороти молӣ ҳамчунин дар қисмҳои низомӣ ва дидбонгоҳҳои сарҳадии ноҳияи Ишкошим ба қайд гирифта шудаанд. Масъулини соҳа ва роҳбарони навоҳии вилоят баҳри бартараф кардани хисорот пешниҳоди мушаххас баён доштанд. Ҳамчунин дар ноҳияи Роштқалъа 5-хонаи истиқоматӣ ба ҳолати садамавӣ дучор шуда, се манзили зисти маскунони деҳаи Нишуспи ноҳияи Шуғнон низ хароб гардиданд.
Роҳбари вилоят ба масъулин супориши қатъӣ дод, то зарари офати табиӣ ҳаматарафа омӯхта шавад ва барои муайян кардани зарар ва расонидани кумак ҷиҳати барқарор кардани хонаҳо тадбирҳои таъхирнопазир андешида шаванд. Аз ин рӯ таъкид шуд, то комиссия бояд дар доираи имконот бо ташкилоти ғайридавдатӣ ҷиҳати ҳаматарафа муайян кардани хисорот, расонидани кумак ва барқарор кардани манзили зисти сокинони манотиқи вилоят фаъолиятро бо низоми муайян ба роҳ монад.
Дар ҷаласа ҳамчунин масъалаи омодагӣ ба давраи тирамоҳу зимистон, иҷрои нақшаи даъвати ҷавонписарон ба сафи артиши миллӣ ва рахна кардани кӯли мавзеи Барсем ва дигар масоили иҷтимоии мардум баррасӣ шуданд.
Имрӯз дар доманакӯҳҳои Тоҷикистон ҳаво то 37 дараҷа гарм мешавад
Имрӯз дар якчанд кумитаю идора нишасти матбуотӣ баргузор мегардад
НИШАСТИ МАТБУОТӢ. Дар корхонаҳои саноатии ноҳияи Шоҳмансур ба маблағи беш аз 600 миллион сомонӣ маҳсулот истеҳсол шудааст
Имрӯз дар шаҳри Душанбе ҳаво то 40 дараҷа гарм мешавад
Имрӯз дар водиҳои Тоҷикистон ҳаво то 42 дараҷа гарм мешавад
НИШАСТИ МАТБУОТӢ. Дар ширкатҳои сохтмонии ҶСК Неругоҳи барқи обии «Роғун» 1120 нафар бо ҷойи кор таъмин гардиданд
Имрӯз дар ноҳияҳои кӯҳии Тоҷикистон ҳаво то 36 дараҷа гарм мешавад
