Чорабиниҳои нахустин дар доираи Форуми байналмилалӣ оғоз шуданд

Душанбе, 07.09.2015, (АМИТ «Ховар»).- Имрӯз дар Душанбе дар доираи таҷлили нахустин солгарди «Рӯзи соҳибкор» бо ташаббуси Кумитаи давлатии сармоягузорӣ ва идораи амволи давлатии Ҷумҳурии Тоҷикистон таҳти унвони «Саҳми бахши хусусӣ дар рушди соҳаи тандурустӣ» мизи мудаввар баргузор мегардад. Мизи мудавар бо иштироки мутахассисон дар бинои Вазорати тандурустӣ ва ҳифзи иҷтимоии аҳолӣ гузаронида шуда, дар он самтҳои асосии рушди соҳаи тандурустӣ ва саҳми соҳибкорони маҳаллӣ дар рушди соҳа муҳокима  мешаванд.
Мавриди зикр аст, ки имсол дар доираи таҷлили нахустин солгарди «Рӯзи соҳибкор» баргузории «Форуми байналмилалии соҳибкории Душанбе-2015» ба нақша гирифта шудааст, ки он таҳти шиори «Саҳми соҳибкориву сармоягузорӣ дар рушди устувор» 14-уми октябри соли равон баргузор мегардад. Барои иштирок дар Форуми байналмилалӣ соҳибкорону сармоягузорони бурунмарзӣ, роҳбарони созмонҳои байналмилалии молиявӣ, намояндагони баландпояи кишварҳои хориҷӣ ва дигар шарикони иқтисодӣ даъват шудаанд.