Дабири кулли СММ аз кишварҳо даъват кард, ки амалиёти худро дар Сурия ҳамоҳанг созанд

Душанбе, 08.10.2015 (АМИТ «Ховар»).- Дабири кулли СММ аз тамоми кишварҳое, ки дар Сурия бар зидди террористон амалиёти ҳарбӣ мегузаронанд, даъват кард, ки амалиёти худро ҳамоҳанг созанд ва аз воқеаҳои ногувор ҷилавгирӣ кунанд. Дар ин бора намояндаи расмии ӯ Стефан Дюжарик ба хабарнигорон иттилоъ дода, ҳамзамон бори дигар аз хатари пайдо шудани ҳавопаймоҳои ҳарбии кишварҳои гуногун дар осмони Сурия ҳушдор дод.  
«Эҳтимол ин вазъро бисёр хатарнок созад», — гуфт ӯ. Ба иттилои ӯ дабири кулл даъват мекунад: «тамоми кишварҳо ва ҷонибҳое, ки дар ин минтақа амалиёти ҳарбӣ мегузаронанд, бояд кӯшишҳоро ба харҷ диҳанд, то  амалҳои худро ҳамоҳанг созанд ва аз тамоми воқеаҳои ногувор ҷилавгирӣ намоянд».
Дюжарик иттилоъ дод, ки дар робита ба ин дар котиботи СММ «иттилоот дар матбуот доир ба машварат миёни низомиёни Русия ва ИМА оид ба бартараф намудани вазъи муноқишавӣ»-ро ба инобат гирифтанд. Ӯ ҳамчунин таъкид дошт, ки «чӣ амалиёте, ки бар зидди гурӯҳҳои ифротгаро роҳандозӣ мешавад, бояд ба чорчӯбаи ҳуқуқҳои башардӯстии байналмилалӣ ҷавобгӯ бошад. Бояд тамоми кӯшишро равона кард, то дар миёни аҳолии осоишта қурбонӣ набошад».