Дар Тоҷикистон тамоюли ба фарзандхонӣ қабул кардани кӯдакон афзоиш ёфтааст

Душанбе, 15.10.2015.(АМИТ «Ховар»).- Тамоюли ба фарзандхонӣ қабул кардани кӯдакони ятим дар Тоҷикистон рӯ ба болоравӣ дошта, дар  панҷ соли охир 3 ҳазору 925 нафар кӯдак ба фарзандхонӣ қабул шудааст. Аз ҷумла,  дар соли 2011 -615 нафар,    соли 2012 — 674,   соли 2013 -713 нафар, соли 2014 -1296 ва дар нӯҳ моҳи соли равон 627 нафар кӯдак ба фарзандхонӣ гирифта шудааст. Инчунин 1756  шаҳрванд барои ба фарзандхонӣ қабул кардани кӯдакон дар навбат мебошанд.
    Нуриддин Саид -вазири маориф ва илми кишвар зимни тавзеҳи  лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси оилаи Ҷумҳурии Тоҷикистон» дар Парлумони мамлакат гуфт, ки тамоюли афзоиши ба фарзандхонӣ қабул намудани кӯдакон аз ҷониби шаҳрвандон шаҳодати вазъи хуби иҷтимоию молиявии оилаҳост.  
    Ҳамзамон вазир афзуд, ки дар се соли охир  судҳои кишвар дар асоси қарорҳояшон ба  88 шаҳрванди Тоҷикистон, ки майли ба фарзандхонӣ қабул кардани кӯдаконро доштанд,  иҷозат  надодаанд:  соли 2013 ба 44 оила,  соли 2014  ба 24 оила ва дар нӯҳ моҳи соли равон ба 20 оила. 
       Дар асоси қарори суд дар соли 2013 баъди ба фарзандхонӣ қабул кардан 5 кӯдак, дар соли 2014 -1 нафар  баргардонида шудааст. Дар зарфи нӯҳ моҳи соли равон баргардонидани кӯдакони ба фарзандхонӣ қабулгардида ҳанӯз ба қайд гирифта нашудааст.