Дмитрий Медведев ба Душанбе меояд

Душанбе, 21.10.15. (АМИТ «Ховар»). — Сарвазири Русия  Дмитрий  Медведев дар  ҷаласаи Шӯрои сарони ҳукуматҳои  ИДМ, ки  30  октябр  дар  шаҳри  Душанбе баргузор  мешавад,  иштирок  менамояд. 
Рӯзномаи  ҷаласа  беш  аз  30  масоилро  фаро  мегирад, ки  қисми  асосиашон  ба рушди ҳамкории тиҷоратию  иқтисодӣ  бахшида  мешавад. Иштирокдорони  ҷаласа  перомуни   густариши ҳамкорӣ дар  бахшҳои  молия, иҷтимоиёт,  ҳифзи  ҳуқуқ  ва ёрии башардӯстона   табодули  афкор намуда, ҷараёни  татбиқи нуктаҳои Шартнома дар  бораи  минтақаи  савдои  озод  аз  18  октябри  соли  2011 — ро  мавриди  муҳокима  қарор  медиҳанд.
Қабули   нақшаҳо ҷиҳати  татбиқи  марҳалаи  сеюми Стратегияи   рушди  иқтисодии  ИДМ  барои  давраи  то  соли  2020,  ҳамчунин  марҳалаҳои  навбатии иҷрои  Стратегияи  ҳамкории  ҷавонон  ва Стратегияи рушди тарбияи  ҷисмонӣ ва  варзиши кишварҳои  Иттиҳод  дар назар  аст.
Дар  ҷаласа  ҳамчунин   нақшаи  чорабиниҳо бахшида ба таҷлили  25 —  солагии  таъсиси  ИДМ дар  соли  2016  ба  тасвиб расонида  мешавад.
Аз  рӯи  натоиҷи  ҷаласа  ба имзо  расонидани Созишнома  дар  бораи шартҳои ҳисоббаробаркунии  байниоператорӣ ҳангоми  хидматрасонии  мухобираи байнидавлатии электронӣ  дар  давлатҳои  аъзои  ИДМ,  ҳамчунин   ворид  намудани  тағйирот  ба баъзе  шартномаю қарордодҳои  байналмилалии  ИДМ  дар назар  аст.