«Футболи хурд» бахшида ба таҷлили Рӯзи милитсия

Душанбе, 26.10. 2015. (АМИТ «Ховар»). —  Бахшида  ба таҷлили Рӯзи милитсия аз 29 октябр то 8 ноябри соли 2015 дар Маҷмааи варзишии Шӯрои ҷумҳуриявии «Динамо»-и Вазорати корҳои дохилӣ байни мақомоти ҳифзи ҳуқуқ, сохторҳои қудратӣ ва дигар корхонаю идораҳои давлатии ҷумҳурӣ мусобиқаи даставӣ оид ба «Футболи хурд» таҳти шиори «Варзиш барои оилаи солим ва зидди нашъамандӣ» баргузор мегардад.  Барои ташвиқу тарғиби рушди варзиш дар ҷумҳурӣ, такмили минбаъдаи тарбияи ҷисмонӣ ва дархостҳо барои иштирок дар мусобиқа аз тарафи ШҶ «Динамо»-и ВКД то 28 феврали соли 2015 қабул  мешаванд.
Ҳамчунин, ба ин муносибат дар толори РБДА ВКД Ҷумҳурии Тоҷикистон аз 1 то 4  ноябри соли равон мусобиқаи шахсӣ-даставӣ оид ба «Шоҳмот ва шашка» миёни кормандони мақомоти ҳифзи ҳуқуқ, сохторҳои қудратӣ ва дигар корхонаю идораҳои давлатии кишвар гузаронида мешавад. Дархостҳо барои иштирок дар мусобиқа ба ШҶ «Динамо»-и ВКД то 31октябри соли ҷорӣ пешниҳод карда шаванд.
Ҳамзамон  рӯзҳои 28-ум то 30-юми октябри соли 2015 дар толори РБДА ВКД Ҷумҳурии Тоҷикистон мусобиқаи шахсӣ-даставӣ оид ба «Шоҳмот ва шашка» байни кормандони ҷузъу томҳои Вазорати корҳои дохилӣ баргузор хоҳад шуд. Дархостҳо барои иштирок дар мусобиқаи мазкур то 27 октябри соли ҷорӣ қабул мешаванд.
Ғолибони мусобиқа бо Ҷом, медал, диплом, сипосномаҳо, ифтихорномаҳо ва туҳфаҳои хотиравӣ сарфароз гардонида мешаванд.