Гусели ҷавонон ба сафи Қувваҳои мусаллаҳи Ҷумҳурии Тоҷикистон

Қурғонтеппа, 02.10.2015. (АМИТ «Ховар»). — Аввалин гурӯҳи наваскарон  аз ҳисоби ҷавонони  вилояти Хатлон  ба  сафи Қувваҳои мусаллаҳи  Ҷумҳурии  Тоҷикистон  сафарбар   шуданд. Дар чорабиние,  ки бахшида  ба  рӯзи даъватшавандагон дар шаҳри Қурғонтеппа  баргузор гардид, раиси  вилояти Хатлон Давлатшоҳ Гулмаҳмадзода зикр кард, ки хизмат  дар сафи  Қувваҳои Мусаллаҳ нишони  мардонагиву  ҷасорат  буда,  аз  ҳар  яки  мо  зиракаву ҳушёриро  талаб  мекунад. «Ҳифзи марзу  бум ва  миллат вазифаи аввалиндараҷаи ҳамаи мо  ба  ҳисоб меравад»,-афзуд  Д. Гулмаҳмадзода.
Тавре  ки аз шуъбаи иттилоотӣ-таҳлилии  мақомоти иҷроияи   ҳокимияти  давлатии  вилояти  Хатлон иттилоъ  доданд, аввалин  шуда  дар ноҳияи  Носири Хусрав  нақшаи даъват ба  сафи Қувваҳои мусаллаҳ  иҷро гардид.