Иқдоми литсейи «Раҳнамо» лоиқи дастгирист

Душанбе, 30.10.2015 (АМИТ «Ховар»). -Ҳайати омӯзгорону хонандагони литсейи «Раҳнамо»- шаҳри Душанбе бо пайравӣ аз сиёсати ҳукумати мамлакат баҳри расонидани кумакҳои моддиву маънавӣ ба сокинони аз офати табиӣ зарардидаи Бадахшон бо ташаббуси худ барои хонандагони мактаби таҳсилоти умумии рақами 23-и ноҳияи Шуғнон дар ҳудуди 50 ҳазор сомонӣ маводи хӯрокӣ, либосҳои зимистона, асбоби хониш, таҷҳизоти техникӣ харид намуданд. Ба иттилои роҳбари литсейи «Раҳнамо» Хайриддин Ҳасанов кумакҳои ҷамъоваришударо намояндагони литсей аз ҳисоби даҳ нафар хонандагони пешқадам ва омӯзгорони литсей ба деҳаи Барсеми ноҳияи Шуғнон расониданд.
Пас аз расонидани кумакҳо дар саҳни мактаби рақами 23-и ноҳияи Шуғнон  дастаи ҳаваскорони литсейи «Раҳнамо» барои ҷамъомадагон барномаи ҳунарии фарҳангӣ пешниҳод карданд, ки он ба базми шодиву нишоти хотирмон мубаддал гашт.
Зимни расонидани кумакҳои хонандагони литсейи «Раҳнамо» сардори раёсати маорифи ВМКБ Шоҳтут Хоников, мудири шуъбаи маорифи ноҳияи Шуғнон Х. Холиқназаров, намояндагони мақомоти ҳокимияти давлатии маҳаллӣ, ҳамчунин падару модарон ва сокинони ноҳияи Шуғнон дар баробари изҳори миннатдорӣ ин иқдоми хонандагони литсейи «Раҳнамо»-ро ҳамчун иқдоми амалӣ баҳри тақвияти ваҳдати миллӣ баҳогузорӣ карданд. 
«Ҷамъоварии кумакҳо аз тарафи хонандагони литсейи «Раҳнамо» барои ҳамсолони аз офати табиӣ зарардида дар тақвияти ҳисси ватандӯстӣ, ҳамгироӣ ва якдилии миллати тоҷик миёни хонандагони мактабҳо аҳамияти бузург дорад», — гуфт директори литсейи «Раҳнамо» Х.Ҳасанов ва илова кард, ки: «Ҳайати омӯзгорон ва хонандагони литсейи «Раҳнамо» ният доранд дар оянда робитаҳои худро бо мактабҳои минтақаҳои кишвар васеъ карда, онро ба анъанаи нек мубаддал кунанд. Мо на танҳо дар мушкилот, балки дар шодиву сурури ҳамдигар низ бояд бо ҳам бошем».