Иштироки Сарвари давлат дар бозии футболи дастаҳои «Истиқлол»-и Тоҷикистон ва «Ҷоҳор Дарул Такзим»-и Малайзия

Душанбе, 31.10.2015 (АМИТ «Ховар»).- Имрӯз Президенти мамлакат Эмомалӣ Раҳмон барои тамошои сабқати финалии Ҷоми Конфедератсияи Футболи Осиё — 2015 байни дастаҳои «Истиқлол»-и Тоҷикистон ва «Ҷоҳор Дарул Такзим»-и Малайзия ба майдони марказии варзишии пойтахт ташриф овард.

Чорабинии имрӯзаи варзишӣ аз дигар бозиҳои футбол бо он фарқ мекунад, ки дар варзишгоҳи марказии пойтахт бозии ҳалкунанда барои муайян кардани чемпиони бозиҳои Осиё барои дарёфти Ҷоми Конфедератсияи Футболи Осиё – 2015 доир гардид.

Дар ин сабқат дастаи қаҳрамони секаратаи Тоҷикистон «Истиқлол» бо либоси варзишии сурху сиёҳ ва қаҳрамони дукаратаи Малайзия «Ҷоҳор Дарул Такзим» бо либоси варзишии сафед рӯи майдон баромаданд.

Боиси хушнудист, ки бо дастгирии бевоситаи Президенти мамлакат, Раиси Кумитаи олимпии кишвар Эмомалӣ Раҳмон футбол дар Тоҷикистон солҳои охир оммавияти васеъ пайдо намудааст, зеро футболбозони дастаҳои алоҳида ва мунтахаби кишвар бозиҳои шавқовар ва натиҷаҳои умедбахш нишон медиҳанд.

Ин аст, ки сафи мухлисони футбол ҳам дар Тоҷикистон солҳои охир хеле афзудааст.

Соли 2014 дар саросари кишвар чорабинии бошукуҳи соли оммавияти футбол доир гардид, ки аз тадбирҳои роҳбарияти давлату ҳукумат дар роҳи рушди ин навъи варзиш буд.  

Имрӯз майдони марказии варзишии пойтахт, ки дорои беш аз 25 ҳазор ҷойи нишаст мебошад, пур аз ҳаводорони футбол ва мухлисони дастаи мунтахаби Тоҷикистон буд.

Иштироки бевоситаи Сарвари давлат Эмомалӣ Раҳмон, ки аз дӯстдорони воқеӣ ва тарғибгари басо фаъоли варзиш ва тарзи ҳаёти солим дар кишвар аст, натанҳо ба футболбозони тоҷик, балки ба кулли мардуми дар ин майдон ҷамъомада рӯҳу илҳоми тоза бахшид.

Бозӣ басо ҷолибу шавқовар ва бо шиддат ҷараён гирифт. Ҳарду даста ҳам барои ба даст овардани пирӯзӣ иродаи қавӣ ва маҳорату малакаи баланд нишон доданд.

Бозӣ бо ҳисоби 0 бар 1 ба фоидаи дастаи «Ҷоҳор Дарул Такзим»-и Малайзия анҷом ёфт.

Баъди аноҷми бозӣ маросими супоридани Ҷоми Конфедератсияи Футболи Осиё — 2015 ба дастаи ғолиб доир гардид.