Изҳори ташвиши Сарвари давлат аз зиёд будани воридоти молҳо нисбат ба содироти он

Душанбе, 21.10.2015. (АМИТ “Ховар”). —  “Таҳлилҳо нишон медиҳанд, ки гардиши савдои хориҷӣ дар вилояти Суғд танҳо дар 7 соли охир 2,3 баробар зиёд гардида, аз ҷумла содироти молҳо 2,8 баробар афзоиш ёфта, соли 2014 ҳаҷми он ба 450 миллион доллари амрикоӣ расидааст. Вале таносуби манфии савдои хориҷӣ то ҳол хеле калон буда, воридоти молҳо нисбат ба содироти он 4,5 баробар зиёд мебошад”, — изҳори ташвиш намуд Сарвари давлат Эмомалӣ Раҳмон дар мулоқот бо роҳбарону фаъолони вилояти Суғд.
Ба таъкиди Президенти кишвар ин дар ҳолест, ки вилояти Суғд дорои нерўи бузурги содироти молҳо, аз ҷумла меваю сабзавот ва маҳсулоти саноатӣ мебошад.
“Аз ин лиҳоз, зарур аст, ки ҷиҳати амалисозии сиёсати воридотивазкунанда ва баланд бардоштани рақобатпазирии молҳои истеҳсоли ватанӣ мунтазам чораҷўӣ карда шавад. Инчунин, татбиқи саривақтии барномаҳои соҳавӣ ва рушди соҳаҳои асалпарвариву парандапарварӣ, боғу токпарварӣ аз ҷумлаи масъалаҳои мубрами фаъолияти ҳаррўзаи роҳбарони мақомоти иҷроияи маҳаллии ҳокимияти давлатӣ ва сохтору мақомоти дахлдор мебошад”, — дастур дод Сарвари  давлат Эмомалӣ Раҳмон.