Машварати кории муовини Сарвазир бо сохтмончиёни қитъаи роҳи оҳани Ваҳдат-Ёвон

Душанбе, 02.10.2015. (АМИТ «Ховар»). – Имрӯз муовини Сарвазири мамлакат Азим Иброҳим барои назорати иҷрои корҳои сохтмонӣ дар қитъаи роҳи оҳани «Ваҳдат-Ёвон» ба ин мавзеъ сафари корӣ анҷом дод.
Муовини Сарвазир зимни сафар аз рафти корҳои сохтмонӣ дар се нақби сохташаванда, ки дарозии умумиашон 3775 метрро дар бар мегирад, дидан намуд. Муайян гардид, ки ташкили корҳои сохтмонии нақбсозӣ тибқи нақша ба роҳ монда шуда, ҳаҷми корҳои иҷрогардида 41.1%-и корҳои пешбинишударо ташкил менамояд, ки ин нишондиҳанда ба имрўз хуб арзёбӣ мегардад.
Мутаассифона, корҳои анҷомёфтаи бетонрезиву мустаҳкамкунии нақб, ки ба қисмҳои поёнӣ ва корҳои дуюмдараҷаи нақбсозӣ нисбат дода шудаанд, аз 5,8 то 33,7%-ро ташкил карда, дар маҷмўъ қобили қабул буда наметавонад, зеро ин корҳо бе назардошти насби релсҳои роҳи оҳан ба инобат гирифта шудаанд.
Ҳамзамон дар баробари сохтмони нақбҳо, сохтмони пулҳои якум, дуюм ва сеюм низ оғоз гардидаанд ва пулҳои чоруму панҷум бошад, дар ҳолати омодагӣ ба оғози корҳои сохтмонӣ қарор доранд. Дарозии умумии 5 пулҳои сохташаванда 681 метрро ташкил мекунад.
Дар машварати сайёри корие, ки бевосита дар назди нақбҳо бо иштироки масъулини соҳа баргузор гардид, муовини Сарвазир диққати ҳозиринро ба иҷрои ҳатмӣ ва саривақтии супоришҳои протоколии назди Сарвазири Ҷумҳурии Тоҷикистон аз 21 августи соли 2015 ҷалб карда, таъкид намуд, ки корҳои сохтмонии ин иншооти стратегӣ зери назорати доимии Президенти Ҷумҳурии Тоҷикистон қарор доранд ва иҷрои пурраи онҳо то сентябри соли 2016 бояд таъмин карда шавад.