«Меҳргон»- иди ҳосилот ва намоиши дастранҷи кишоварзон

Душанбе, 06.10.2015 (АМИТ «Ховар»).-Бахшида  ба Рўзи кишоварзӣ ва Иди «Меҳргон» дар  Вазорати кишоварзии Ҷумҳурии Тоҷикистон 8 октябр маҷлиси тантанавӣ баргузор мешавад. 
Сарчашмаҳои таърихӣ гувоҳӣ медиҳанд, ки дар радифи ҷашнҳои Наврўз ва Сада Мергон низ таърихи чандҳазорсола дорад. Аз ҷумла, муаллифи «Шоҳнома»-и безавол Абдулқосим Фирдавсӣ пайдоиши ин ҷашнвораро ба замони салтанати Ҷамшеду Фаридун мансуб медонад, вале ба таври мушаххас таҷлили Иди «Меҳргон» аз давраи ҳукмронии Сосониён ба ҳукми анъана даромадааст. Писари шоҳ Шопури Сосонӣ-Ҳурмуз дар ин самт қадамҳои аввалинро гузошт ва бо гузашти замони муайян Меҳргон шукўҳу шаҳомати хосса пайдо намуд, ки дар замони салтанати Сомониён боз ҳам пуршукўҳ ҷашн гирифта мешуд.
Гузаштагони бофарҳангамон 15-уми Меҳрмоҳро рўзи меҳр меномиданд ва одатан ҷашни «Меҳргон» дар ҳамин рўз таҷлил мешуд. Хулоса, «Меҳргон» баробари инкишофи зироаткорӣ ва ҷорӣ гардидани тақвими деҳқонӣ пайдо шуда, иди ҳосилот ва намоиши дастранҷи кишоварзон аст.