Муаррифии барномаи «Auto Audit» дар БМТ

Душанбе, 29.10.2015. (АМИТ «Ховар»).- 28 октябр дар Бонки миллии Тоҷикистон таҳти сарпарастии муовини якуми раиси бонк Ҷамолиддин Нуралиев ва иштироки мутахассисони хадамоти аудити дохилии ташкилоти қарзии мамлакат бо намояндагони ширкати «Thomson Reuters» мулоқоти корӣ доир гардид. 
Мудири минтақавӣ оид ба рушди фаъолияти филиали ширкати «Thomson Reuters» дар шаҳри Маскав Эдуард Кан ва мудири минтақавӣ оид ба тиҷорати филиали ширкати номбурда дар шаҳри Маскав Сергей Николаев барномаи «Auto Audit»-ро муаррифӣ карданд. 
Намояндагони ширкати «Thomson Reuters», ки бо хизматрасониҳо ва маҳсулоти босифати худ дар аксари давлатҳо маълуму машҳуранд, зимни муаррифии фаъолияти ширкат иброз доштанд, ки барномаи «Auto Audit» аз ҳисоби ба роҳ мондани идораи босифату пай дар пай ва шаффофи аудити дохилӣ, ташкили бонизоми кори аудити дохилӣ ва коҳиш додани таъсири омили инсонӣ, баланд кардани фарҳанги хавфи идорӣ ва сатҳи идораи корпоративӣ дар бонк метавонад барои зиёдтар кардани самаранокии кор шароити мусоид фароҳам орад.  
Дар ҷараёни вохӯрӣ намояндагони ташкилоти қарзии кишвар ҳамчунин тавонистанд ба саволҳои худ оид ба муҳлат ва истифодаи барномаи мазкур дар дигар давлатҳо, тарафҳои мусбат ва манфии он, то чӣ андоза такмил ёфтани лоиҳаи мазкур дар солҳои охир ҷавобҳои мушаххас гиранд.