Мулоқоти сафири Тоҷикистон бо мушовири ширкати “Cokey”

Душанбе, 27.10.2015 (АМИТ “Ховар”).- 23 октябри соли 2015 вохӯрии Сафири Фавқулода ва Мухтори Ҷумҳурии Тоҷикистон дар Япония Ҳамрохон Зарифӣ бо мушовири ширкати “Cokey” Казуко Мотомура баргузор гашт. 
Ширкати мазкур дар кишварҳои Осиёи Марказӣ, Русия ва Чин якчанд бахшҳо дорад. Дар Ҷумҳурии Тоҷикистон бахши коркарди ибтидоии ширинбия фаъолият дорад (ҶДММ “Аввалин”).
Зимни вохӯрӣ ҷонибҳо дар бораи фаъолияти имрӯза ва нақшаҳои ояндаи ширкати “Cokey” дар Ҷумҳурии Тоҷикистон ва рушди ҳамкорӣ мубодилаи афкор намуданд.
Ҳамзамон аз ширкати мазкур хоҳиш шуд, то аз хориҷ кардани маҳсулоти нимтайёр ба коркарди он дар Тоҷикистон бо ифтитоҳи корхонаи коркарди ниҳоии ширинбия машғул шавад ва ҳамкории зичро бо Тоҷикистон роҳандозӣ кунанд.
Хонум Мотомура зикр намуд, ки ширкати онҳо дар ин бора тадбирҳо андешида истодааст, аммо дар ин самт монеаҳо мавҷуд ҳастанд. Ҷонибҳо тасмим гирифтанд, ки барои аз байн бурдани монеаҳои мавҷуда дар ҳамкорӣ бо Ҳукумати Тоҷикистон тадбир андешанд.