Нақши китоб чун сарчашмаи дониш ва манбаи маърифат бузург аст

Душанбе, 19.10.2015.(АМИТ «Ховар»).-Дар доираи омодагиҳо ба ҷашни 3000-солагии  Ҳисор сокинони ноҳия дорои Кохи фарҳангии хеле зебою замонавӣ  гардиданд. Коҳи фарҳанг бо 700 ҷой нишаст бо харҷи қариб 27 миллион сомонӣ маблағҳои ҷумҳуриявӣ дар масоҳати 1, 3 гектар бунёд шудааст. Толори васеъ ва даромадгоҳи кохи фарҳанг бо санъати хоси меъмории кандакорӣ ороиш ёфтааст. Тибқи иттилои Сафаралӣ Бобоев, директори Кохи фарҳанг аллакай дар ин кохи фарҳангӣ чандин чорабиниҳо доир гардиданд, аз ҷумла бахшида ба 3000- солагии Ҳисор  рӯзи 17-уми октябр консерти Ҳунарманди халқии Тоҷикистон Шамсиддин Муҳиддинов баргузор гардид.
      Дар арафаи ҷашни 3000-солагӣ дар ноҳияи Ҳисор китобхонаи зебо қомат афрохт. Тавре  ки директори китобхонаи марказии ноҳия Савринисо Мӯсоева иброз дошт, хонандагони Ҳисори шодмон чунин китобхонаи замонавиро танҳо орзу мекарданд. Хушбахтона, бо дастгирии Сарвари давлат  ин орзуи чандинсолаи мардуми Ҳисор амалӣ  гашт. Ҳарчанд  ки имрӯз технологияи муосир рӯи кор омадааст, аз ҷумла компютеру маводи электронӣ, вале нақши китоб ҳамчун сарчашмаи дониш ва манбаи илму маърифат бузург боқӣ мемонад.