Қӯшунҳои Сурия дастаҳои террористонро таъқиб мекунанд

Душанбе, 26.10.15. (АМИТ «Ховар»). — Қӯшунҳои  Сурия амалиёти   ҳарбиро   барои  рафъи  оқибатҳои ҳамлаи  дастаҳои   гурӯҳи  террористии «Давлати исломӣ»  дар қисми  шарқии  шаҳри Ҳома  роҳандозӣ  намуданд. 
Тавре  ки  рӯзномаи  «Ал — Ватан»  хабар  дод,  ҷанговарони  қувваҳои  ҳукуматӣ  террористонро  дар канори Ҳанасир таъқиб  намуда,  ду  теппаи  стратегиро таҳти назорати  худ  гирифтанд. Бино ба  хабари  ТАСС, рӯзи  ҷумъаи  гузашта  силоҳбадастон дар  ин  минтақа «роҳи  ҳаёт» — роҳи  мошингарди  байни   шаҳрҳои Ҳома  ва  Алеппоро  иҳота  намуда буданд. 
Садҳо  нафар  сокинони   шаҳри  Алеппо  барои зарба  задан ба  дастаҳои  террористон, ки вазъи таъминоти  дуюмин  шаҳри  калони  кишварро  зери  хатар  гузоштаанд,  ба  дастаҳои ихтиёриёни  халқӣ  ҳамроҳ  мешаванд.
Рӯзҳои  охир  «Давлати  исломӣ» қувваҳои  зиёдеро  аз Ракка ва биёбони Сурия ба  шаҳрҳои  Алеппо ва  Ҳома фиристод. Ба  гуфтаи  коршиносон, дастаҳои «Давлати исломӣ» ва гурӯҳи  дигари ифротталаби  «Ҷабҳат ан — Нусра»ба  танзими амалиёти  ҳарбии   зидди қӯшунҳои  ҳукуматӣ  машғуланд.