Теъдоди фавтидагони зилзилаи Афғонистону Покистон ба 154 нафар расид

Душанбе, 26.10.2015. (АМИТ «Ховар»). – Теъдоди фавтидагони зилзилаи Афғонистон ва Покистон ба 154 нафар расид. Дар ин бора сомонаи рӯзномаи покистонии «Даун» иттилоъ медиҳад.

Бино ба иттилои манобеъ, бар асари зилзила дар Афғонистон 24 нафар ва дар Покистон 130 нафар ҳалок гаштааст. 

Ёдовар мешавем, ки имрӯз соати 13.39 вақти маҳаллӣ дар Афғонистон зилзила бо қувваи 7,5 бал ба амал омад. Маркази зилзила дар умқи 212,5 километр дар километри 45-уми қисмати ҷанубу ғарбӣ аз шаҳри Ҷурм ҷойгир будааст.  

Ларзишҳои зеризаминӣ дар кишварҳои Осиёи Ҷанубӣ ва Марказӣ низ эҳсос гардиданд.