Тоҷикистон дар форуми «Соҳибкории хурди кишварҳои узви СҲШ ва БРИКС» иштирок мекунад

Душанбе, 09.10.15. (АМИТ «Ховар»). — Тоҷикистон  дар  кори  форуми  якум  таҳти  унвони  «Соҳибкории  хурди  минтақаҳои  кишварҳои  узви  СҲШ ва  БРИКС», ки  аз  21  то  23  октябр  дар  шаҳри  Уфа (Бошқирдистон)  баргузор  мешавад,  иштирок  менамояд.
Ҳадафи  форум барқарор  намудани ҳамкории  миёни  ширкатҳои  хурду  калони  минтақаҳои  кишварҳои  СҲШ  ва  БРИКС  дар  принсипҳои  субконтрактатсия ва аутсорсинг, ҳамчунин ҷалби  сармояҳо ва  афзун  намудани теъдоди лоиҳаҳои  муштараки  соҳибкорист. 
Намояндагони  Бразилия, Ӯзбекистон,  Афғонистон,  Беларус, Туркия, Италиё,  Сербия, Чин, Канада, Британияи  Кабир,  Покистон,  Уганда, Ҳиндустон ва  Русия барои  иштирок дар  форум дархост додаанд.
Ғайр  аз  ин,  дар  доираи  форуми  якум Намоишгоҳи  соҳибкорони  минтақаҳои  кишварҳои  узви СҲШ ва  БРИКС доир  мегардад. Иштирокдорони  намоишгоҳ — корхонаҳои  асосии  соҳибкории  хурду  миёнаи  кишварҳои  CҲШ ва БРИКС, маҳсулоти нави саноатӣ, дастовардҳои бахши сайёҳӣ, тиб ва  кишоварзиро ба  маърази  намоиш  мегузоранд.