Забони давлатӣ дорои арзиши волои миллист

Душанбе, 05.10.2015. (АМИТ «Ховар»). — Дар  Хадамоти муҳоҷирати Вазорати меҳнат, муҳоҷират ва шуғли аҳолии ҶТ бахшида ба таҷлили Рӯзи забони тоҷикӣ мизи мудаввар баргузор гардид.
 Сардори Хадамот Тоҳир Каримзода ҳозиринро бо ин санаи фархунда-6-умин солгарди Рӯзи забони давлатӣ табрик намуда, забони давлатиро арзиши волои миллӣ ва рушди онро аз вазифаҳои муқаддас ва муҳимтарини хизматчиёни давлатӣ номид.
Сармутахассиси Шуъбаи муносибатҳои байналмилалӣ, робита бо ҷомеа ва ҳамватанони бурунмарзӣ Абдуллоҳи Қодирӣ гуфт, ки дар давлатдории Сомониён нақши забони форсии дарӣ ё тоҷикӣ дар иттиҳоди қавмҳои сокини ин минтақа хеле назаррас буд.
Омӯзиши забони модарӣ, ки аз хонавода, кӯдакистон ва мактаб оғоз мегардад, пеш аз ҳама аз падару модар ва муаллим ба хотири ҳифзи асолати миллӣ ҷиддият ва қатъияти тамомро дар донистани забон дар тарбияи наслҳо тақозо дорад. Забони модарӣ дар ҳама давру замон чеҳра ва шинохти ҳар миллат буда, имрӯз низ дар муаррифии тамаддуну фарҳанг ва давлатдории миллии мо омили муҳим дониста мешавад.
Имрӯз Хадамоти муҳоҷират, ки сохтори танзимкунандаи умури муҳоҷират мебошад ва тибқи оморҳои мавҷуда зиёда аз 800 ҳазор  шаҳрванди кишвар дар хориҷа ба сар мебаранд ва қисмате аз онҳо муқимӣ гаштаанд, бояд ба нигоҳдории забони тоҷикӣ, анъана, расму ойин ва тарзи зиндагонии тоҷикон ва ҳамватанони бурунмарзӣ  диққати ҷиддӣ диҳад.